BR LA UNION – Ipalubosen ti Department of Transportation ti panagusar iti GCash, Paymaya debit ken credit cards kas baro a pamay-an ti panagbayad iti plete ti LRT ken MRT mangrugi iti Hulyo.
Karaman daytoy iti plano a panangipatungpal iti cashless turnstiles iti sidong ti automatic fare collection system, a mabalinen a direkta nga -tap iti mobile phone wenno card iti ruangan ti tren, a saanen a kasapolan a gumatang wenno ag-reload ti Beep card.
Ti nasao nga addang ket kas sungbat iti pammilin ni Presidente Ferdinand Marcos Jr. a pagbalinen a mas episyente ken madanon ti transportasyon publiko ken maaddaan iti silulukat ken nalaka a maibagay a sistema ti panagbayad a konektado kadagiti nadumaduma a pinansiyal a plataporma, kas kadagiti maus-usar kadagiti dadakkel a siyudad iti ballasiw-taaw.
Nakatuding a maisayangkat ti pilot testing ken information drives sakbay ti opisial a pannakaiyuswatna.
Agtultuloy met ti pannakitinnulong ti DOTr kadagiti transport operators ken service providers tapno masigurado ti naannayas nga implementasyon ti nasao a programa.
