BR LA UNION – Inbutaktak ti Presidential Anti-Organized Crime Commission (PAOCC) a naudi a nakita idiay Japan ni Cassandra Li Ong, ti otorisado a pannakabagi ti rinaut ken naserraan a Philippine Offshore Gaming Operator (POGO) Lucky South 99 idiay Porac, Pampanga.
Iti press briefing idi Sabado, kinuna ni PAOCC spokesperson Winston Casio a nagturong ni Ong idiay Japan idi umuna a kuwarter ti 2025 kalpasan a nawayawayaan manipud pannakaibaludna idiay Senado.
Nupay kasta, inamin ti opisyal a kalpasan a natunton daytoy idiay Japan, awan ti ideyada no sadino ti nagturongan itan ni Cassie Ong.
Kinunana a naipaulog ti arrest warrant kontra kenni Ong idi bulan ti Marso wenno Mayo.
Nupay kasta, segun iti opisyal ti Presidential Anti-Organized Crime Commission, subject ni Ong ti Interpol Red Notice ken ti agdama ket makikoordinar ti opisinada kadagiti law enforcement agencies tapno birokenda ni Ong ken isublida ditoy Pilipinas.
Nakadepende iti Department of Foreign Affairs (DFA) ti pannaka-kanselar ti pasaporte ni Ong.
Immun-una a naamwan nga awanen ni Ong ditoy Pilipinas idi inwaragawag ni Senador Sherwin Gatchalian bayat ti sesyon ti Senado idi Biyernes.
Segun iti Senador, naruk-atan ni Ong iti kangitingitan ti transition iti nagbaetan ti 19th ken 20th Congress, agsipudta awan pay ti naidatag idi a kaso kontra kenkuana.
Iti agdama, addan ti nakapenpen nga arrest warrant nkontra kenni Ong seknan iti kaso a qualified human trafficking.
