LA UNION – Bwineltaan ni Antipolo City 2nd District Rep.Romeo Acop ni Senator Ronald “Bato” Dela Rosa, babaen ti imbaga na, nga isardeng na ti aglemmeng iti palda ni Vice President Sara Duterte ket sangwen dagiti akusasyon kontra kenkuana kas sigud a nangidaulo ti Philippine National Police seknan iti nadara a war on drugs ti administrasyon Duterte.
Pinaglibakan ni Acop iti awan basaran nga alegasyon ni Dela Rosa, a ti testimonya ni sigud nga Iloilo City Mayor Jed Patrick Mabilog iti House Quad Committee ket paset ti “demolition job” a ti target ket ti Vice President ken dagiti kaalyado na para iti 2028 elections.
Impaganetget ni Acop nga awan ti demolition job nudiket lehitimo dagiti salodsod ti komite, nga agkasapolan met ti nalawag a sungbat.
Impaganetget pay ni Acop nga awan ti political maneuvering a mapas-pasamak ken napateg kunana iti testimonya ni Mabilog iti maisay-sayangkat nga imbestigasyon.
Kabayatanna, imbaga ni Dela Rosa, a ti imbestigasyon ti Kamara ket maibilang a “fishing expedition.”
Iti met biang ni Manila 6th District Rep. Bienvenido “Benny” Abante Jr., pinaglibakan na iti akusasyon ni Sen. Bato.
Kinuna na a nakapokus iti imbestigasyon tapno madetermina ti kinapudno kadagiti napasamak a krimen ken mapag-sungbat dagiti responsable.
Kinuna ni Abante a kas legislators, trabaho da nga ipaay ti hustisya kadagiti biktima ti illegal drug operations ken ibutaktak dagiti sindikato nga adda iti likod.
Kinarit ni Abante ni Dela Rosa nga awaten ti imbitasyon ti Quad Comm tapno mangngegan ti palawag na.
