BR LA UNION – Inlawlawag ni Malacañang a saan pay a napagsasaritaan iti anyaman a panagtataripnong ti isyu iti Charter Change wenno panang-amyendar ti Konstitusyon.
Segun kenni Palace Press Officer Undersecretary Claire Castro, iti agdama ket saan pay nga ipapaayan atensiyon ti Presidente dagiti singasing ti sumagmamano a mammanday-linteg mainaig iti Charter Change (Cha-Cha), political amendments wenno dagiti economic provisions.
Inlawlawag ni Castro a no maiplastar ti konkreto a linaon dagiti singasing, isunto pay laeng a mabalin nga adalen ken desisyunan ni Presidente Ferdinand Marcos Jr.
Kabayatanna, idi napagsaludsodan no suportaran ti administrasyon ti plebisito no mapasamak, kinuna ni Castro nga agpannuray daytoy iti linaun ti Charter Change.
Idiay Kamara, agresibo nga ilunglungalong ni Deputy Speaker Ronaldo Puno iti Charter Change (Cha-cha) babaen iti maysa a Constitutional Convention (Con-con).
Kinuna ni Puno, kayat na a maikorehir ti kunana a “nalidem’ ken ‘kurang ti ‘proseso’ na a probisyon iti 1987 Constitution partikular iti isyu ti impeachment, voting procedures, ken Judicial and Bar Council.
Impaganetget ni Puno a kasapolan iti nalawag ken naurnos a probisyon tapno maliklikan ti pannaka-tikaw ken saan a panagkikinna-awatan iti panangipatungpal ti linteg.
