BR LA UNION – Kiniddaw ni Vice President Sara Duterte iti Senate Impeachment Court nga ibasura iti Articles of Impeachment kontra kenkuana, ken impaganetgetna nga addaan ti “fatal constitutional, procedural, and substantive defects.”
Iti atiddog a sungbat nga insumite dagiti abogado na idiay Senado idi kalman, Lunes, Hunyo 1, imbaga ni Duterte a maipagarop a saan a maiyannurot iti Konstitusyon iti reklamo isunga rumbeng nga ibasura.
Maysa kadagiti kangrunaan nga argumento ti kampo ti Bise Presidente ket ti maipagarop a panangabuso iti karbengan ti House Committee on Justice, kalpasan a nangisayangkat ti maaw-awagan a “mini-trial” iti panagdengngeg ti kaso.
Segun pay iti depensa, iti Kamara ket addaan laeng iti bileg a mangirugi ti impeachment proceedings, bayat a ti Senado ket pagrebbengan na nga usigen ken desisyunan iti kaso.
Impaganetget pay iti kampo ni Duterte a naapektaran ti panagbalin a patas ti proseso gapu kadagiti waragawag ti sumagmamano a mammanday linteg nga adda naan-anay a botos para iti impeachment ket napigsa nga ebidensya kontra kenkuana sakbay pay a nagleppas ti panagdengngeg.
Segun iti sungbat na, nalabsing iti karbengan ti Bise Presidente iti due process agsipudta adda dagiti baro nga ebidensya a naisango a maipagarop a saan a karaman iti orihinal a reklamo.
Nainget pay a pinaglibakan ni Duterte dagiti akusasyon seknan iti maipagarop a biddut a panangusar ti confidential funds, unexplained wealth, ken panaglabsing iti Statement of Assets, Liabilities and Net Worth (SALN).
Impaganetget pay ti kampo ti bise presidente, nga awan pay ti pinal a desisyon manipud iti anyaman a pagukuman a mangpaneknek ti graft, corruption, plunder, wenno anyaman nga iregularidad iti panangusar ti pondo.
Malaksid dayta, maipagarop a napaay iti Articles of Impeachment a paneknekan iti anyaman a pagibasaran iti konstitusyon nga isuna ket nagbasol iti culpable violation of the Constitution, bribery, graft and corruption, high crimes, wenno betrayal of public trust.
