BR LA UNION – Binabalaw ni House Committee on Justice Vice Chair ken San Juan Rep. Ysabel Maria Zamora iti kinuna ni Zamboanga City Mayor Khymer Olaso a “kalokwan” iti proseso ti impeachment ti Kamara.
Iti maysa a Facebook video, nagbalin a darasudos ti panagsasao ni Olaso kontra kadagiti kadagiti mammanday-linteg, banag a sinungbatan ni Zamora.
“With due respect to my former colleague, I don’t think words such as ‘kalokohan’ and ‘bugok lang ang gumagawa’ are necessary in any intelligent discourse,” pahayag ni Zamora.
Inlawlawag ni Zamora a ti impeachment ket saan laeng a maysa a political option ngem ketdi obligasyon iti sidong ti Konstitusyon a masapul a tamingen ti Kamara no adda maidatag a reklamo.
Kinunana a mabaybay-an dagiti opisyales iti trabahoda no saanda a suroten ti mandato ti Konstitusyon.
Pinabasol met ti pannakabagi ti San Juan iti alegasyon ni Olaso a saan nga ar-aramiden dagiti mammanday-linteg ti trabahoda gaputa nakatutok da iti impeachment.
Segun kenni Zamora, agtultuloy ti panangipasa ti Kongreso kadagiti gakat a makatulong iti biag dagiti Pilipino a maigiddan kadagiti hearing.
Iti agdama, kit-kitaen ti House Justice panel nu adda ti “probable cause” kadagiti reklamo kontra kenni Bise Presidente Sara Duterte kalpasan nga indeklarada nga umdas ti porma, substansiya, ken basaran.
Pinalubosan met ti plenaryo iti komite nga ituloy iti hearing uray naka-recess ti Kongreso manipud Marso 21 agingga Mayo 3.
