BR LA UNION – Nangimuntar ti checkpoints dagiti otoridad tapno saan a maka-asideg dagiti tattao iti six-kilometer permanent danger zone iti Mayon Volcano idiay Albay.
Naipaulog ti nasao a restriksyon kalpasan a naipangato iti Alert Level 3 ti Bulkan Mayon gapu iti panagipugso na ti pyroclastic density current (PDC) wenno “uson”.
Nangipatungpal da metten ti pre-emptive evacuation kadagiti nadumaduma nga ili idiay Albay kas idiay Camalig, Ligao City, Malilipot, Daraga ken Guinobatan.
Impakdaar ti Philippine Institute of Volcanology and Seismology (PHIVOLCS) a mabalin a pakatayan ti maysa a tao no maisarang iti “uson”.
Mangnamnama ti PHIVOLCS a mangipatungpal ti restrictions dagiti opisyales ti Albay tapno malapdan ti aniaman a didigra.
