Nangiruar ti Show Cause Order iti Commission on Higher Education (CHED) kontra iti Ateneo de Manila University mainaig iti imbestigasion iti pannakatay dagiti student-athlete nga isuda Rene Baterbonia ken Divine Adili.
Segun iti CHED, nabilin iti Ateneo nga agsubmitir ti nasapataan a palawag, incident report, certificate of compliance kadagiti agdama nga alagaden ti komision, ken dadduma pay a kasapulan a dokumento iti uneg ti 10 nga aldaw manipud iti pannakaawat ti pammilin.
Pagpalpalawagen met ti komision iti unibersidad no apay ta saan a rumbeng a mapatawan da ti maitutop a pannusa mainaig dagiti maipagarop a panaglabsing kagiti alagaden iti panangisayangkat ti off-campus activities, dagiti probision ti Republic Act No. 11053 wenno ti Anti-Hazing Act of 2018, ken iti obligasion daytoy a siguraduen iti umno a panangiwanwan kadagiti estudyante iti sidong ti prinsipio a loco parentis.
Kenuna ti ahensia a manon a daras a nagkiddaw ti National Capital Region Office dagiti kasapulan a rekord ken dokumento ngem saan daytoy a naipasa ti unibersidad iti naikeddeng a panawen.
Maipalagip a natay da Baterbonia ken Adili iti maysa a team-building activity ti Ateneo Men’s Basketball Team idiay Dipaculao, Aurora idi Hunyo 8.
Kabayatanna, inpasigurado ti CHED nga agtultuloy iti nainget nga imbestigasion tapno maamuan iti sibubukel a kinapudno iti insidente ken masigurado iti pagsungbatan dagiti rumbeng nga agsungbat, bayat nga agtaltalinaed a prayoridad ti komision iti kinatalged ken pagimbagan dagiti estudyante kadagiti institusion ti nangatngato nga edukasion.###
