BR LA UNION – Adda dagiti ipatungpal a reporma ti Department of Education (DepEd) iti K to 12 curriculum babaen ti pannakitinnulong ti CHED ken TESDA tapno mataming ti sumagmamano nga isyu, a kas ti saan nga umanay ti pannakasanay ken saan pay a naan-anay a nakasagana dagiti estudyante tapno agtrabaho.
Segun kenni Education Secretary Sonny Angara, manipud iti napalabas a 33 nga asignatura, lima laengen ti maaramid a required subjects idinto a maibilang nga electives dagiti dadduma.
Ti tarigagay daytoy ket maipaayan dagiti estudiyante iti nalawlawa a pagpilyan ken saan a maikahon iti maymaysa a track a kas iti puro a vocational wenno academic.
Impaganetget ni Sec. Angara nga iti panawen itan ti artificial intelligence (AI), napateg ti flexibility, ket mabalin a paggiddanen dagiti estudyante iti skills training ken academic subjects.
Impasigurado ti sekretaryo a papigsaenda ti koordinasyon iti industriya tapno mataming ti isyu a maipagarop a saan a “job-ready” dagiti nagturpos ti K to 12.
Inpakaammo pay ni Angara a papigsaenda ti job immersion manipud 300 nga oras ket pagbalinen da nga 640 nga oras, a katupag ti dandani maysa a semestre ti aktual a kapadasan iti trabaho.
Pattien ni Angara a dagitoy a panagbalbaliw ket mangipaay iti ad-adda a paglaingan ken nalawag a dalan nga agturong iti trabaho wenno kolehiyo para kadagiti estudiyante.
