BR LA UNION – Nagpanawagan ni Senior Deputy Speaker Aurelio “Dong” Gonzales Jr. ti maysa a nailyan nga addang tapno protektaran dagiti botante manipud digital deception, kasaruno iti report seknan iti panagusar dagiti peke a social media accounts tapno depensaan ni sigud a presidente Rodrigo Duterte ken imanipula dagiti isyu a mabalin a makaapekto iti resulta ti 2025 midterm elections.
Kinuna ni Gonzales, rumbeng a protektaran dagiti umili a Filipino manipud kadagiti accounts nga agiwar-waras ti propaganda ken panangallilaw.
Segun iti mammanday linteg manipud Pampanga, rimuar iti report ti Reuters a dandani one-third a social media account nga agpo-post seknan iti kaso ni Duterte iti International Criminal Court (ICC) ket peke.
Segun iti tech firm a Cyabra manipud Israel, dagiti kapada a taktika ket maus-usar ita iti maysa a “deliberate, organized” a kampanya tapno buklen iti opinyon ti publiko seknan iti masungad nga eleksiyon inton Mayo.
Nagballaag ni Gonzales a ti agtultuloy a panagwaras ti digital manipulation ket maysa a seryoso a pangta iti integridad ti proseso ti eleksiyon ditoy pagilian.
Inallokoy pay ni Gonzales iti Department of Education (DepEd), Commission on Higher Education (CHED), ken Department of Information and Communications Technology (DICT) nga agtitinnulog a mangiyuswat ti national digital literacy program tapno matulungan dagiti estudyante ken publiko a madetermina ken labanan dagiti disinformation campaign.
Nagpanawagan pay daytoy iti amin a partido a direkta a supyaten iti panagusar ti “click armies” ken mabay-bayadan nga influencers.
