BR LA UNION – Mamati ni Philippine Coast Guard (PCG) for the West Philippine Sea Commodore Jay Tarriela a suportaran ti China ti siasinoman a kandidato iti 2028 General Elections a saan a mangsupsuporta iti karbengan ti Pilipinas idiay West Philippine Sea.
Imballaag ti opisyal a sigurado a mangipakita ti suporta ti Chinese government kadagiti kandidato iti national polls a saan a mangkuwes-kuwestiyon iti kaadda ti China iti mapagsusupiyatan a kabaybayan.
Kinunana a sigurado a palawaen ti China ti ‘information operations’-na bayat nga umas-asideg ti eleksiyon.
Kangrunaan ditoy iti operasyon ti Foreign Information Manipulation and Interference (FIMI) ti China, a segun kenni Tarriela, mabalin a bumallaet sakbay ti eleksiyon, tapno manipula-en ti public opinion iti kayatna a mapasamak.
Gapu iti daytoy, kinunana, nasken a malapdan ti nasaknap a disinformation a sigurado nga ipatungpal ti gobierno ti China, nangruna dagiti waragawag ti sumagmamano a pulitiko a direkta a a mangsupsuporta iti salaysay ti China.
Kinunana a no malapdan ti transparency initiative ti gobierno mainaig iti west philippine sea, posible nga inton tawen 2028 ket malipatan dagiti Pilipino no siasino dagiti pulitiko a napaay a mangtakder iti posisyon ti Pilipinas idiay WPS.
Kabayatanna, iti agdama, awan pay met ti naawat ni Tarriela a direktiba manipud Malacañang a manglimitar iti pannakilangenna iti media laksid ti nabara a panagsinnukat ti statement iti nagbaetanna ken ti Chinese Embassy idiay Manila.
