Pimmalag ti Chinese Embassy a nakabase idiay Maynila ti akusasyon ni US Ambassador to the Philippines MaryKay Carlson nga illegal nga agus-usar ti China ti water cannons iti panagraut da ti barko ti Pilipinas asideg idiay Bajo de Masinloc idi Disyembre 4.
Inakusaran ti Embahada ni Carlson a saan a nagbasar daitoy ti basic facts ken nagwaragawag lattan iti awan basaran na nga akusasyon kontra iti lehitimo nga addang ti China tapno protektaran ti territorial sovereignty ken maritime interest da.
Kinuna ni Chinese Embassy nga awan ti karbengan ti Estados Unidos ken dagiti kaalyado na a makbiang kadagiti maritime disputes kadagiti mapagsusupiatan a kabaybayan ti nagbaetan ti Pilipinas ken China.
Mainaig iti daitoy ket dinagadag ti Embahada dagiti nasao a pagilian a respetuen ti territorial sovereignty, maritime rights ken interes ti China iti daitoy a kabaybayan, italna ti panangiwaras ti pagaapan a pagtaudan ti nakarkaro a sitwasyon, ken ti pananggulo ti kapia ken stabilidad idiay WPS.
Kabayatanna, maysa aldaw kalpasan ti insidente idiay Bajo de Masinloc, nangipila ti baro a diplomatic protest ti Pilipinas kontra China babaen ti maysa a ‘note verbale’.
Nakatuding a makisinnarak ni DFA Secretary Enrique Manalo kenni Chinese Ambassador to the PH Huang Xilian tapno dakamaten ti kabaruan nga insidente idiay West Philippine Sea.
