Dumanon ti nasurok 5K mobile subscriber identities ti mabalin a na-acess ti Chinese spy a nabiit pay a naarestar nga agpalpaliiw iti headquarters building ti Commission on Elections.
Pinasingkedan daitoy ni NBI spokesperson Ferdinand Lavin a nagkuna a ti inaramat ti espiya tapno magun-od dagitoy a datos ket ti international mobile subscriber identity (IMSI) catcher.
Kinunana ket makaaw-awat ti sensitibo a datos ken impormasyon ti IMSI catcher kas kadagiti text messages, mobile numbers, ken uray dagiti telephone records.
Inlawlawag na a kabaelan daitoy a device a makagun-od ti datos manipud ti 500 a metro agingga tallo a kilometro.
Makuna nga nasursoren ti espia dagiti napapateg a pasdek ti gobierno ditoy Pilipinas kas iti Supreme Court, DOJ, Villamor Air Base, BIR, ken COMELEC. Agtultuloy met ti isaysayangkat nga imbestigasyon ti NBI mainaig iti nasao nga chinese spy.
