BR LA UNION – Inarestar dagiti otoridad dagiti siyam a ganganaet ken dua a Pilipino idiay Mactan-Cebu International Airport gaputi imet da a dackel a kantidad ti kwarta, sakbay iti May 2025 midterm elections.
Segun iti tagapagsarita ti PNP a ni Police Brigadier General Jean Fajardo iti maysa a press conference, ginandat a lumugan iti maysa a pribado nga eroplano agturong idiay Manila dagiti 11 a suspek agarop alas-10:30 ti rabii idi madiskubre dagitoy iti naisayangkat nga inspeksyon kadagiti imet da a bagahe.
Dagiti suspek ket buklen ti 7 a Chinese, maysa nga Indonesian, maysa a Kazakhstani, ken dua a Pilipino.
Nadiskubre dagiti otoridad a dua kadagiti pito a Chinese national ket addan ti notice manipud Interpol gaputi panaglabsing ti Article 308 ti Revised Penal Code wenno panagtakaw, nga addaan ti piyansa nga agbalor ti ₱10,000.00.
Segun iti naisayangkat imbentaryo iti nakumpiskar a kuwarta, umabot iti pakabuklan a balor ti ₱441,922,542.37 iti narekober.
Iti agdama, adda iti kustodiya ti General Aviation terminal ti kuwarta.
Dagiti naaresto suspek ket agtultuloy a maim-imbestigaran para iti posible panangidatag ti maiyannatop a kaso.
