Maysa manen a China Coast Guard (CCG) ti nasaripatpatan iti kabaybayan a sako ti Pilipinas.
Segun kenni Commodore Jay Tarriela, Spokesperson ti Philippine Coast Guard (PCG) idiay West Philippine Sea, sumagmamano a daras a nag-radio ti BRP Cabra iti CCG vessel 3302.
Daitoy ket tapno lapdan ti agtultuloy a panangasideg ti barko ti China kalpasan a masaripatpatan ti kaadayo nga 83-85 nautical miles manipud ti kosta ti Palauig, Zambales.
Impaganetget ti BRP Cabra iti dakdakkel a CCG vessel nga ilegal ti panagtalinaed da ti Exclusive Economic Zone ti Pilipinas, a panaglabsing met ti Philippine Maritime Zones Act, United Nations Convention on the Law of the Sea (UNCLOS), ken ti 2016 Arbitral Award.
Impasigurado manen ti PCG nga agtultuloy da a bantayan ti EEZ ti pagilian tapno lapdan nga agbalin a normal dagiti ilegal nga aktibidad ti China iti West Philippine Sea.
