BR LA UNION – Kiniddawen ti Criminal Investigation and Detection Group (CIDG) iti International Criminal Police Organization (Interpol) a mang-isyu ti red notice kontra kenni sigud a presidential spokesman Atty. Harry Roque.
Kinumpirma daytoy ni CIDG Director Major Gen. Nicholas Torre III.
Immunan a nagpatulod ti tracker teams iti CIDG tapno arestaren ti aganay 50 a dadduma pay a kakadwa nga akusado ni Roque, kabilang ni Cassandra Li Ong a maim-imbestigaran gapu iti maipagarop a pannakairaman iti iligal nga operasyon ti Philippine Offshore Gaming Operator (POGO).
Maipalagip a nangiyisyu ti Angeles City Regional Trial Court Branch 118 ti arrest warrant kontra kenni Roque idi Mayo 15 gaputi panaglabsing iti Republic Act 9208 wenno Anti-Trafficking in Persons Act of 2003.
Nagramot ti kaso kontra kada Roque, Ong ken iti 49 pay iti indatag ti Department of Justice idi Abril gaputi pannakairaman dagitoy iti operasyon ti scam hub a Lucky South 99 idiay Porac, Pampanga.
