Binilin ti Commission on Audit iti panangisayangkat ti fraud audit kadagiti flood control projects ti Department of Public Works and Highways idiay Bulacan nga aggatad ti P44 billion, kasaruno dagiti issue nga imbutaktak ken nakadismayaan ni Presidente Ferdinand Marcos Jr.
Iti pakabuklan a P548 billion pondo para iti flood control iti intero a pagilian ket kadakkelan iti Central Luzon a P98-B ken ti Bulacan iti kadakkelan ti pondo iti rehiyon.
Maibasar iti COA memo idi Agosto 12, dagos a maipa-audit ti imbestigasyon ken nabilin dagiti distrito ti DPWH nga isubmitir a dagos dagiti dokumento.
Sakbayna ket dinakamat ti Presidente idi Agosto 11 nga iti Bulacan iti addaan ti kaaduan a flood control projects a 668, ngem karaman latta iti probinsya kadagiti malaylayos kas maibasar iti National Adaptation Plan ti 2023–2025.
Kayat ni PBBM nga agpalawag iti Timothy Construction Corporation kasaruno ti panakadiskubre a saan pay a nalpas iti river protection structure idiay Calumpit iti laksid ti report daytoy a nalpasen iti proyekto idi Pebrero 2023.
