LA UNION – Nakatuding a mangbukel ti Commission on Elections (Comelec) iti Fact Finding Committee a mangimbestigar iti kandidatura ni Bamban, Tarlac Mayor Alice Guo.
Iti memorandum nga inruar ni Comelec Chair George Erwin Garcia, binilinna ti Law Department ti ahensiya a maki-koordinar iti National Bureau of Investigation, Office of the Solicitor General ken iti Senate Committee on Women, Children, Family Relations and Gender Equality para kadagiti kasapolan a dokumento.
Babaen daytoy, maammuan no adda ti misrepresentation iti impormasyon nga indeklara ti Mayor iti certificate of Candidacy na idi 2022 elections.
Kalpasan daytoy, masapul met nga agaramid ti Law Department iti rekomendasyon apaman a malpas ti fact finding investigation.
Iti Comelec En Banc ti mangikeddeng nu mapilaan wenno saan ti kaso ni Guo.
Immunan a pinasingkedan ti National Bureau of Investigation a ti fingerprint ti mayora ket ag-match ti Chinese passport holder a ni Guo Hua Ping.
