BR LA UNION – Pormal nga inikkat ti Philippine Army kas paset ti reserve force ni Cavite 4th District Representative Kiko Barzaga gapu iti nagbalin nga aksiyon na itay nabiit bayat a suot na ti military uniform.
Iti nagbalin a waragawag ni Philippine Army Spokesperson Col. Louie Dema-ala, naikkat kas reservist ni Barzaga kalpasan ti inaramid na a waragawag iti social media accounts na, a mangal-allokoy iti publiko ken iti dadduma pay a uniformed personnel nga agtignay kontra iti gobyerno wenno iti agdama nga administrasyon.
Kinuna ni Dema-ala, dagiti nasao a klase iti waragawag ket posible a mangikabil iti peligro a posisyon ti puwersa armada ti Pilipinas kas non-partisan organization.
Kinuna na pay a dagiti imbag-baga ti kongresista ket mangipasimudaag ti sedition, ken nalawag a panaglabsing iti General Headquarters Standard Operating Procedure (GHQ SOP) No. 07 a naiyisyu idi June 7, 2018.
Kabayatanna, tinakderan iti Philippine Army ken mismo nga Armed Forces of the Philippines (AFP) nga agtalinaed da a non-partisan ken kaatnuman ket saan a makipaset iti isyu politika agsipudta agtalinaed da a napudno iti kawes ken iti konstitusyon.
