BR LA UNION – Nangidatag ni House Majority Leader Ferdinand Alexander “Sandro” Marcos iti gakat a mangipatungpal ti nair-irut nga allagaden a “no work, no pay” para kadagiti miyembro ti Kongreso, tapno masungbatan ti problema a panaglangan iti trabaho, mapapigsa ti accountability, ken maprotektaran ti pondo ti ili.
Iti House Bill (HB) No. 7432, a napaulwan ti “No Work, No Pay for Members of Congress Act,” ti suweldo ken dadduma pay a benepisyo dagiti senador ken kongresista ket maibasar iti aktuwal a panagserrek ken pannakipaset iti sesyon ti plenaryo, panagdengngeg dagiti komite, ken dadduma pay nga opisyal a pagrebbengan iti lehislatibo.
Iti explanatory note, imbaga ni Marcos a ti prinsipyo a “no work, no pay” ket masansan nga ipat-patungpal kadagiti mangmangged iti intero a pagilian, ngem dagiti miyembro ti Kongreso nga addaan ti responsibilidad iti panagputar ti linteg ken mangibagbagi kadagiti umili ket agtultuloy nga umaw-awat ti kompensasyon nga uray saan a sumsumrek iti trabaho.
Gaputi dayta kunana, kumarkaru ti panagdanag ti publiko seknan iti absenteeism, saan a panagtrabaho ti naimbag ken panagsayang ti kuwarta dagiti agbay-bayad ti buwis.
Ranta ti gakat a masiguro a ti pondo ti gobyerno ket magastos laeng nu agtrab-trabaho a nasayaat dagiti nabotosan nga opisyal, malaksid laeng a maitandudo ti transparency, accountability, ken integridad ti gobyerno.
Iti sidong ti gakat, mabayadan laeng dagiti mammanday linteg kadagiti aldaw a simrek da iti trabaho ken aktibo a mangipatpatungpal kadagiti opisyal nga aktibidad, kas ti panagdar-ay iti plenaryo, pannakipaset iti panagdengngeg ti komite a pakaibil-bilangan, ken panangisayangkat kadagiti otorisado nga opisyal nga aktibidad.
Dagiti saan a naingkalintegan a panaglangan ket agresulta iti pannakapukaw ti kompensasyon, idinto a maikonsidera met dagiti balido a rason kas ti panagsakit ngem nasken nga adda sertipikasyon manipud iti lisensiyado a doktor, opisyal a representasyon, aprubado a biyahe wenno misyon, ken maipalubos ti leave of absence.
Maibilang a present dagiti mammanday linteg nu dumar-ay kadagiti otorisado a panagtataripnong dagiti komite, sesyon ti Commission on Appointments (CA), House of Representatives Electoral Tribunal (HRET), bicameral conference committees, ken kadagiti opisyal a misyon nga aprubado ti House Speaker.
Tapno mapapigsa ti transparency, ibil-bilin ti gakat kadagiti sekretarya ti Senado ken Kamara a mangisayangkat ti inaldaw a monitoring iti attendance ken aramiden silulukat iti publiko dagiti rekord ti panagserrek iti trabaho.
Ti panangirwar ti kompensasyon ket maibasar laeng iti beripikado a presensya.
Tinalantan pay ni Marcos ti isyu a konstitusyonal, ket impaganetget na a nalawag iti 1987 Constitution a ti opisyal a kompensasyon dagiti miyembro ti Kongreso ket mabalin nga ituding babaen ti linteg.
Adda ipataw a pannusa ti nasao a gakat kontra kadagiti mangpeke ti attendance records wenno panangala ti kompensasyon a saan met nga ar-aramiden ti opisyal a pagrebbengan.
Ti nasao nga aramid ket maibilang a misconduct ken mapatawan ti disiplina maiyannurot iti agraraira nga allagaden ti Kongreso.
Innayon ni Cong. Marcos a ti panangipasa ti nasao a gakat, ket pammaneknek iti kari ti Kongreso nga itandudo iti kangatuan a pagrukodan iti serbisyo publiko ken masiguro a dagiti nabotosan nga opisyal ket pudno nga agserserbi kadagiti umili, kagiddan ti panawagan para iti napartak a panangpasingked ti gakat.
