BR LA UNION – Okupado dagiti establisimiento ken tourist areas ditoy San Fernando City, La Union tunggal madanon ti Semana Santa gaputi panagsangpet dagiti turista.
Nupay kasta, pagdanagan ti sumagmamano a negosyante iti posible a panagbaba ti bilang dagiti bisita ita a tawen gaputi agdama a krisis a sangsangwen ti pagilian.
Iti pannakiuman ti Bombo Radyo kenni Jeniffer Silla, maysa a cottage caretaker, masansan a dumanon ti agingga ₱5,000 ti abang ti cottage nangruna iti Sabado de gloria, kumpara iti ₱1,500 nu gagangay nga aldaw.
Kabayatanna, nainget ti seguridad kadagiti aplaya kalpasan ti sumagmamano nga insidente a nairekord iti napalabas a tawen, pakairamanan dagiti kaso ti pannakalmes.
Nainget a maipatungpal ti pannakaiparit ti panaginum iti arak, maitunos iti direktiba ti City Government, a nasken a suroten dagiti mangimatmaton kadagiti pasilidad.
Iti Acapulco Beach ditoy siyudad, istrikto nga ipatungpal da iti oras ti panagdigos nga agpatingga laeng ti alas 6:00 ti sardam.
Adda dagiti otoridad a nadutukan nga ag-monitor ken agbantay tapno masigurado a masurot ti nadakamat nga allagaden.
