BR LA UNION – Inbutaktak ni Pasig City Mayor Vico Sotto a mapapati a pangpangtaan ti agassawa a kontraktor nga isuda Curlee ken Sarah Discaya dagiti sigud nga empleadoda a posible a tumestigo maibusor kadakuada ken maipagarop nga ibla-blackmail da dagiti mammanday-linteg ken agkidkiddaw iti bayad tapno saanda a mairaman iti ledger a maipagarop nga iggemda, a naglaun iti listaan dagiti opisyal a nairaman kadagiti anomalous flood control projects.
Iti Facebook postna, kinuna ti mayor a sumagmamano a tattao ti nangibaga kenkuana nga agtultuloy ti panagpangta dagiti agassawa kadagiti sigud nga empleadoda tapno saanda nga agtestigo kontra kadakuada.
Segun kenni Mayor Sotto, imbaga kenkuana dagiti dua a mammanday-linteg a mapapati a nagkiddaw ti agassawa a Discaya iti kuwarta kasukat ti saanda a pannakairaman iti ledger.
Kabayatanna, kinuna met ni Mayor Sotto a nupay nasayaat a pangrugian ti pannakatiliw ni Discaya, kinunana nga ad-adu koma pay ti mapag-sungbat.
Maipalagip a karaman ni Sarah Discaya kadagiti indarum ti Office of the Ombudsman gapu iti graft ken malversation mainaig iti mapapati a P96.5 million a ghost flood control projects.
Iti agdama, nakabalud ni Sarah Discaya iti BJMP idiay Lapu-Lapu City, Cebu bayat a ni Curlee Discaya ket nakadetine idiay Senado kalpasan a ma-cite in contempt.
