BR LA UNION – Imbilin ti Department of Agriculture ti temporaryo a panangsuspinde iti distribusyon dagiti abono wenno fertilizers manipud iti lima a supplier kalpasan a makaawat ti reklamo seknan iti kalidad dagiti produkto.
Segun kenni Agriculture Secretary Francisco Tiu Laurel Jr., mangisay-sayangkaten ti imbestigasyon iti ahensya kontra kadagiti kumpanya nga addaan ti kontrata iti gobiyerno ken maki-tinnulong ti gobyerno iti Department of Agriculture Fertilizer and Pesticide Authority tapno amirisen nu pasado iti intuding nga annuruten ti gobyerno dagiti maibun-bunong nga abono.
Impaganetget ti sekretaryo a saan a naingkalintegan nga ipaayan ti substandard a produkto dagiti supplier, idinto nga ipapaay met ti gobyerno iti presyo nga idiay-diaya da iti a bidding.
Iti sidong ti direktiba, ma-freeze pay laeng amin a fertilizer stocks manipud kadagiti lima a supplier agingga a maikkan ti clearance ti Office of the Secretary.
Nabilin met amin a kameng ti Department of Agriculture nga agsumite ti report kadagiti nakapenpen a delivery, agdama a transaksyon ken dokumento tapno napaspas iti isay-sayangkat nga imbestigasyon.
Kabayatanna, saan pay a dinakamat ti ahensya iti eksakto a detalye dagiti reklamo, ngem kinuna ti departamento a paset daytoy iti napairutan a panagbantay iti kalidad dagiti farm inputs nga us-usaren dagiti mannalon iti tengnga ti ngumatngato a gastos iti produksyon.
