BR LA UNION – Manarimaan ti pannaki-koordinar ti Department of Agriculture (DA) kadagiti baro a nabotosan a Local Government Units (LGUs) nangruna kadagiti saan a pro-admin a nangabak a kandidato seknan iti P20 kilo rice program ti gobyerno.
Segun kenni Agriculture Secretary Francisco Tiu Laurel, tarigagay da a maitultuloy iti rollout ti P20 kilo a bagas.
Aminado iti sekretaryo a madanagan da, agsipudta saan a sigurado nu ituloy dagiti baro a nabotosan ti nasao a programa, nangruna dagiti saan a kaalyado ti administrasyon.
Partikular a dinakamat ni Laurel iti Cebu agsipudta saan da a sigurado nu kayat ti baro a gobernador nga ipatungpal ti P20 kilo rice program ti gobyerno.
Nupay kasta, siniguro ni Sec. Laurel a saan nga agpili ti Department of Agriculture agsipudta ti napateg ket matulungan dagiti umili a nakurapay tapno makissayan ti bak-baklayen da a rigat.
Daytoy met laeng ti nagbalin a direktiba ni President Ferdinand Marcos Jr. a maipaayan dagiti lugar a nang-nangruna nga agkasapolan.
Siniguro ni Laurel nga umdas iti suplay ti bagas para iti nasao a programa.
