Nakatuding a mangiwaras ti Department of Agriculture (DA) iti P5K fuel subsidy kadagiti mannalon tapno matulongan ida a mabaelan ti panagngato ti presyo ti langis gapo iti gyera idiay Middle East.
Kasaruno daitoy iti pannakagun-od ti P50M a pondo ti DA a segun kenni Agriculture Secretary Francisco Tiu Laurel Jr. ket nakatukon para kadagiti 9,570 a mannalon a mangar-aramat kadagiti makinarya, a naibasar met iti datos ti Bureau of Agricultural and Fisheries Engineering (BAFE).
Nupay kasta, dagiti laeng nakarehistro iti Registry System for Basic Sectors in Agriculture ti makaawat kadagiti ayuda.
Segun iti DA, apektado ti produksyon ken transportasyon iti agrikultura gapo iti nangato a presyo ng diesel a nangpangato metlaeng ti plete dagiti biahero kasta met iti gatad dagiti kangrunaan a magagatang.
Kabayatanna, agtultuloy met iti panangiwaras iti naisina pay a fuel subsidy para met kadagiti mangngalap.
