Kinumpirma ti Presidential Anti-Organized Crime Commission (PAOCC) a nabigbig dan iti mayor na kasabwat ti ‘boss of all bosses’ ti Philippine Offshore Gaming Operators (POGO).
Daitoy ket kalpasan nga inreport ti PAOCC ti kinasiasino ti ‘boss of all bosses’ ti POGO a ni Huang Zhiyang, nga isu’t dadaulo kadagiti ilegal nga aktibidades.
Kinuna ni PAOCC Spokesperson Winston Casio nga adda pay dagiti mayor ditoy Pilipinas a koneksyon ni Huang Zhiyang ken timmulong pay kenkuana a makalibas ditoy pagilian.
Kinunana, kalpasan ti sumagmamano nga aldaw a panagraut idiay Bamban, ken pannakagun-od kadagiti umdas nga ebidensia a mangtiliw kenkuana, dagus met daitoy nagpukaw.
Mainaig iti daytoy, nabigbigda ti sumagmamano nga indibidual a timmulong ken ni Huang, ken maisagsaganan ti report para iti Executive Secretary a maisubmitir kenni Presidente Ferdinand Marcos Jr.
Kabayatanna, awan met ti inted ni Casio a bilang no mano a mayor ti karaman iti panagtulong iti boss ti POGO.
