BR LA UNION – Nailanad iti House Committee on Justice dagiti alegasyon ni sigud a senador Antonio Trillanes IV a maipagarop nga immawat iti pamilya ni sigud a Presidente Rodrigo Duterte ti pakabuklan nga P181.6 million a makunkuna a naggapo iti maysa a drug lord a nabigbig a ni Sammy Uy.
Iti sinapataanna a salaysay, imbaga ni Trillanes a dagiti maipagarop a tseke a na-encash ket naiturong iti naduma-duma a miyembro ti pamilya Duterte, kabilang ni Vice President Sara Duterte, a maipagarop a nakaawat ti P22.3 million.
Karaman pay iti listaan ti dadduma a miyembro ti pamilya nga addaan ti naduma-duma a kantidad ti transaksyon.
Impaganetget ni Trillanes a dagitoy ket mabalin nga ibilang nga “impeachable offenses” kas ti betrayal of public trust, graft and corruption, ken dadduma pay a nadadagsen a kaso.
Inramanna pay ni Sammy Uy iti mas nalawlawa a network a maipagarop a konektado kadagiti sigud nga isyu iti droga, kabilang dagiti personalidad nga isuda sigud nga economic adviser Michael Yang ken isyu nga adda pakainaiganna iti ilegal a droga ken POGO operations.
Sinuportaran na pay dagiti alegasyon ken nagbalin a testimonya ti sigud a pulis a ni SPO4 Arturo Lascañas a maipagarop nga adda pakainaigan dagiti personalidad iti operasyon ti shabu laboratories idiay Davao City.
Kabayatanna, kinumpirma ti Anti-Money Laundering Council (AMLC) a 18 a transaksyon a nakailanad iti affidavit ni Trillanes ti maitunos iti database ti konseho, kabilang ti sumagmamano a transaksyon nga adda pakainaiganna kenni Sammy Uy.
Segun kenni House Committee on Justice Chairperson ken Batangas 2nd District Representative Gerville Luistro, dagiti natakwatan ket paset iti agtultuloy a panangsukimat ti komite kadagiti alegasyon iti sidong impeachment proceedings kontra iti bise presidente.
Iti agdama, agtultuloy iti panangsukimat ti Kamara dagiti dokumento ken testimonya kas paset iti nalawlawa nga imbestigasyon iti maipagarop a P6 bilyon “únexplained wealth” ken dadduma pay nga akusasyon kontra iti pamilya Duterte.
