Impaganetget iti Malacañang a nabayagen a nakatukon iti daga a mausar para iti pannakaipasdek ti Pax Silica project ken saan a basta laeng a napili para ti nasao a ‘venture.’
Segun kenni Palace Press Officer Undersecretary Claire Castro, naitudingen idi pay tawen 2019, kagiddan iti panagsagana para iti Southeast Asian (SEA) Games, dagiti ‘buildable areas’ wenno lugar a mabalin a pangipasdekan kadagiti proyekto idiay New Clark City.
Nasurok-kumurang 6k nga ektarya ti nakatukon para ti open green spaces, forest reserves, ken upland farming, bayat a 3,500 nga ektarya met ti para iti Pax Silica project.
Impasiguro manen iti Malacañang a saan a maapektaran dagiti mannalon iti pannakaipasdek kadagiti artificial intelligence (AI) ken semiconductor industrial hub, a manamnama a makapagpataud iti de-kalidad a trabaho ken mangigubuay kadagiti dadakkel a panagpuonan manipud kadagiti high-tech industries.
