BR LA UNION – Mabalin nga agtalinaed iti Pantawid Pamilyang Pilipino Program (4Ps) dagiti benepisyaryo iti nasur-surok ngem pito a tawen, nu maamyendaran iti 4Ps law.
Iti post-SONA discussion, imbaga ni Department of Social Welfare and Development (DSWD) Sec. Rex Gatchalian, mangted dalan iti panawagan ni Presidente Ferdinand Marcos Jr. iti maikapat a SONA, nga agtalinaed dagiti 4Ps beneficiaries agingga a kasapolan.
Ngem inlawlawag ti sekretaryo, a ti kapaut ti panagtalinaed ti benepisyaryo iti programa ket nakadepende iti estado ken kalidad ti panagbiag wenno saan pay a nakasagana a maikkat iti listaan dagiti benificiaries.
Nakailanad iti Republic Act No. 11310 wenno Act Institutionalizing the Pantawid Pamilyang Pilipino Program, a maysa daytoy a “human capital investment that provides conditional cash transfer to poor households for a maximum period of seven years.”
Inpadamag pay ti DSWD chief nga adda pakabuklan a 1.4 milyon a Pilipino iti nagturposen iti 4Ps sipud nangrugi idi 2022.
Umabot met ti aganay dua a milyon a pamilya ditoy pagilian ti agturpos iti programa ti sumaruno a tawen, maiyannurot iti probisyon ti linteg a maximum period of seven years, a panag-numar iti nasao a programa ti gobyerno.
