LA UNION – Mamati ni House Assistant Majority Leader Rep. Raul Angelo Bongalon a napateg iti nabukel a Quad Committee hearing tapno maikkat iti makunkuna nga overlapping jurisdiction iti baetan ti uppat a komite a sigud a mangisay-sayangkat ti nagsina a panagdengngeg maipapan iti naduma-duma nga isyu kas iti extra judicial killings (EJK), war on drugs, illegal drug trade, ken koneksyon dagitoy iti Philippine offshore gaming operators (POGO).
Kinuna ni Bongalon, ti panangbukel ti komite ket agserbi nga instrumento tapno matunton ken madetermina ti kinapudno iti likod dagiti nakaam-ames a krimen nga adda pakanaigan dagiti maim-imbestigaran nga isyu.
Kinunana pay a napateg ti imbitasyon ti komite kada sigud a Presidente Rodrigo Duterte ken Senator Ronald de La Rosa, agsipudta isuda ti nakatugaw idi panawen a napasamak dagiti nasao a krimen.
Inyarig ni Bongalon iti maysa a kaso a kasapolan a maimbitaran iti pinaka-competent a witness tapno madetermina wenno makita iti kinapudno.
Inlawlawag met ni Lanao De Sur Cong. Zia Alonto Adiong a dagiti serye ti hearing a maisayangkat iti sidong ti quad committee ket nakasentro kadagiti immunan a rimuar iti imbestigasyon ti dua a a komite idiay Kamara ken naduma-duma nga ahensiya ti gobyerno.
Awan iti sabali a tarigagay da a makita ditoy nu saan nga iti kaadda ti koneksiyon dagiti im-imbestigaran a krimen dagiti ahensiya, maibasar kadagiti inisyal a nadiskubre ken napagsisilpo nga impormasyon.
Impaganetget met ni La Union Congressman ken House Asst. Majority Leader Paolo Ortega a ti maisayangkat nga imbestigasyon ket bin-ig nga in aid of legislation.
