BR LA UNION – Pinaglibakan ti tech billionaire a ni Elon Musk iti report ti New York Times a maipagarup nga agus-usar ti ketamine ken dadduma pay a droga idi 2024 Presidential elections.
Iti maysa a post iti X (sigud a Twitter), pinaglibakan ni Musk dagiti alegasyon maikontra kenkuana.
Impaganetget ni Musk a nabayagen a saan nga agtum-tumar ti ketamine, a naireseta laeng idi para iti mental health.
Immuna ti daytoy, nadlaw ti publiko ti sugat iti mata ni Musk a nakita idi nagpakada kas mangidaulo ti Department of Government Efficiency (DOGE), maysa nga opisina a nabukel iti sidong ti administrasyon ni Trump.
Inlawlawag ni Musk a ti pannakadangran na ket gapu iti aksidente a pannaka-danog ti rupa-na babaen ti anakna a ni “X” bayat ti panagang-angawda.
Immunan nga inaklon ni Musk nga agus-usar ti prescribed ketamine tapno labanan iti depresyon ken maipagarop a nakatulong kenkuana tapno agbalin nga innovative.
Maipalagip a nagparnuay ti kontrobersya ni Musk idi 2018 kalpasan a nagsigarilyo ti marijuana iti maysa a podcast event.
Inlanad pay ti New York Times a ni Musk ket agim-imet ti pillbox a naglaun ti 20 nga agas kabilang iti Adderall, stimulants, ken psychedelics ket maipagarop nga aggi-giddan nga us-usarenna dagitoy.
Kabayatanna, imbaga ni U.S. President Donald Trump nga awan ti ammo na iti maipagarop a regular a panagusar ti droga ni Elon Musk idi 2024 presidential elections.
Saan metten a nangipaay ti kanayunan a komento ni Trump seknan iti report ti New York Times a maipagarop nga agus-usar ni Musk ti ketamine, ecstasy, ken psychedelic mushrooms bayat a tumul-tulong idi iti kampanya ni Trump.
