BR LA UNION – Kinumpiskar ti Philippine Drug Enforcement Agency (PDEA) iti mapatta-patta a ₱176.4 milyon a balor ti ilegal a droga iti serye ti operasyon manipud Abril 25 agingga Mayo 2, agdama a tawen.
Kabilang a nakumpiskar iti 12,381.51 a gramo ti shabu, 260 ecstasy tablets, 72,178 gramo ti marijuana kush, 14,007.94 gramo ti napagango a bulong ti marijuana, 17,950 gramo ti napagango a tangkay ti marijuana, ken 6,575 a pidaso ti mula a marijuana.
Kaadwan nga operasyon ket naisayangkat idiay National Capital Region (NCR), Central Visayas, Caraga Region, ken Cordillera.
Idiay Caloocan City, nakakumpiskar ti PDEA Regional Office-National Capital Region (RO-NCR) ken Philippine National Police-Drug Enforcement Group (PNP-DEG) iti 11 kilo ti shabu iti maysa nga entrapment operation idi Abril 27.
Idi Abril 29, aganay 72.178 kilo ti marijuana kush iti nadiskubre idiay Port Area, Manila iti operasyon ti PDEA, Manila International Container Port, ken Bureau of Customs.
Inwaragawag ni PDEA Director General Isagani R. Nerez iti kinaragsak na iti panagballaygi dagiti otoridad ken naraem iti koordinasyon dagiti law enforcement agencies iti kampanya kontra droga.
Segun kenni Nerez, amin nga operasyon ket resulta ti intelligence report a nakasentro iti panang-parmek dagiti organisado a grupo ti droga.
