BR LA UNION – Madanagan iti sumagmamano a Filipino community idiay Estados Unidos gapu iti agtultuloy nga immigration crackdown ni US President Donald Trump, a mangikabil ti peligro ti aplikasyon para iti panagtalinaed dagiti Pinoy iti nasao a pagilian ken panagbuteng iti posible a deportation para kadagiti illegal alien.
Sipud nagsubli ni Trump idiay White House idi Enero 20, 2025, ken pinirmaan na dagiti executive order a mangimandar a papigsaen iti seguridad ti US, naipatungpal metten ti nair-irut a proseso iti panag-audit ti visa, a mangparmek kadagiti saan a dokumentado nga immigrants iti pagilian.
Karaman kadagiti nasao a baro nga addang iti suspensyon ti panagawat kadagiti refugee ken gandat a gibusan iti birthright citizenship—maysa nga addang a temporaryo a linapdan dagiti pagukuman.
Segun iti Department of Homeland Security ti US, adda iti aganay 350,000 a saan a dokumentado a Filipino nga immigrant idiay US idi tawen 2022, ken nailista a ti Pilipinas ket maikalima a kadackelan a pagtataudan dagiti saan a dokumentado nga immigrants, kasaruno iti Mexico, Guatemala, El Salvador, ken Honduras.
Segun met iti US Census Bureau, idi tawen 2022 ket dimmanon iti 4.1 milyon a Filipino-Americans ti agnanaed sadiay Estados Unidos.
Kinuna ti Philippine Embassy idiay Washington DC nga idi Enero 28, 2025, adda 16 a Filipino nationals ti adda iti kustodiya ti US Immigration and Customs Enforcement (ICE).
Kadagitoy a bilang ket 15 ti adda deportation orders da bayat a maysa iti maur-uray iti kaso na.
