BR LA UNION – Kinumpirma dagiti otoridad a siyam a tattao ti natay ken adda pay dagiti nadun-dunor kalpasan a dimmungpar ti maysa nga SUV iti agu-ummong a tattao kabayatan ti street festival ti Filipino Community a Lapu Lapu Day idiay Vancouver, Canada.
Napasamak ti insidente, agarop alas 8:00 (local time) idi rabii, Abril 26, 2025 idiay Fraser neighbourhood, Vancouver.
Dagus a naarestar iti nagmaneho ti kotse a maysa a 30-anyos a lalaki, residente ti nasao a siyudad.
Immunan nga inlawlawag ti pulisiya a saan nga ‘act of terrorism’ iti napasamak.
Dagus met a nangipeksa ti pannaki-simpatitya ni Canadian Prime Minister Mark Carney ket inawaganna ti pasamak nga ‘horrific events.’
Naamwan a rinambakan ti Filipino community idiay Vancouver iti Lapu Lapu Day, kas pananglagip iti Pilipino a ni Lapu Lapu nga anti-colonial leader idi 16th century.
Maibasar iti istatistika ti Canada, iti Vancouver ket pagnanaedan iti nasurok 38,600 a Filipino sipud idi 2021 wenno mangibagbagi ti 5.9 percent iti pakabuklan a populasyon ti western Canadian city.
