Inpakaammo ni Presidente Ferdinand Marcos Jr. a naipangato iti Strategic Partnership ti relasion ti Pilipinas ken Canada kalpasan ti pannakitaripnongna ken ni Canadian Prime Minister Mark Carney idiay British Columbia.
Segun iti Presidente, nagsaritaanda ti pannakapauneg ti bilateral relations ken addang tapno mataginayon ti natalinaay a panagtinnulong ti dua a pagilian. Adda met ti napalawa a bilateral meeting kadua dagiti agduduma a delegasion.
Inted pay dagiti dua a lider kadagiti foreign minister-da ti action plan tapno maidur-as dagiti napagnunumuan nga addang iti panangtaming kadagiti sangalubongan a karit ken panangpapigsa iti future-ready partnership.
Impaganetget pay ni Marcos ti kinapateg ti panagtitinnulong iti depensa ken seguridad kas pundasion ti pannakapapigsa ti relasion ti dua a pagilian.
Nagtulag pay ti Pilipinas ken Canada a mapapartak iti negosasion para iti Canada-Philippines Free Trade Agreement ken palawaen ti panagtitinnulong iti nadalus nga enerhia, disaster resilience ken food security.
Pinasingkedan manen dagiti dua a pagilian ti suporta para iti nawaya ken silulukat nga Indo-Pacific, panagraem iti internasional a linteg, ken ti 2016 arbitral ruling a mainaig iti West Philippine Sea.
Napirmaan pay dagiti katulagan iti turismo, kultura, panagtrabaho ken panagakar tapno ad-adda a mapatibker ti relasion ti nasurok a maysa a milion a Filipino-Canadians ken dagiti dua a pagilian.###
