LA UNION – Nasurok a sangaribu a pamilya wenno buklen iti nasurok dua ribo nga indibiduwal iti nasapa nga immakar wenno nagtungpal ti pre-emptive evacuation sakbay pay a narikna iti rungsot ti bagyo pepito idi Kalman ditoy probinsiya ti La Union.
Ti nasao a bilang dagiti evacuees a naiturong iti naduma-duma nga evacuation centers ket manipud munisipalidad ti Bangar, Balaoan, Aringay, Sto. Tomas, Bauang, Rosario, Bacnotan, Agoo, Caba, San Juan, Sudipen, Luna, ken City of San Fernando.
Dagus met a naggunay ti Provincial Government of La Union ket babaen ti tulong ken koordinasyon iti Department of Social Welfare and Development, naibunong iti ribu a family food pack kadagiti residente ken evacuees ditoy probinsiya ti La Union.
Daytoy ket babaen iti panangidaulo mismo ni Governor Raphaelle “Rafy” Ortega-David.
Kabayatanna, iti naduma-duma a munisipyo particular kadagiti coastal towns a kas idiay Caba, Bangar, ken ditoy siyudad ti San Fernando iti nangipatungpal ti pre-emptive evacuation dagiti apektado a pamilya ket impatungpal ti Deployable Response Group (DRG) team iti panangidaulo ti Coast Guard District North Western Luzon, kadwa da iti Philippine Air Force (PAF), Philippine National Police, Barangay Officials ken dadduma pay a kameng ti LGU’s.
Maibasar iti datus, iti bilang dagiti evacuees iti lima nga ili ( a pakaibilangan idiay Bangar, Luna, Agoo, Sto. Tomas, and Rosario) adda pakabuklan a 388 a pamilya wenno 1,129 individuals ti agtaltalinaed iti uneg ti Evacuation Centers, bayat a 10 a pamilya wenno buklen ti 31 individuals iti naki-dagus laengen kadagiti cabagyan da.
Idiay Brgy Santiago Sur, Caba, La Union nasapa iti naipatungpal a Pre-emptive evacuation iti 14 a pamilya wenno 61 individuals , babaen ti Deployable Response Group (DRG) team, a buklen ti Coast Guard District North Western Luzon, Philippine National Police (PNP), Bureau of Fire Protection (BFP), MDRRMO, ken Barangay Officials.
Naiturong dagiti residente iti Evacuation Center idiay Brgy Poblacion Sur, Caba, La Union.
Iti Barangay San Agustin ditoy siyudad, naipatungpal ti pre-emptive evacuation iti 112 a pamilya wenno 411 individuals manipud Brgy San Agustin, San Fernando City, La Union, babaen ti Deployable Response Group (DRG) team.
Naiyakar met dagitoy iti evacuation area iti Catbangen Elementary School, San Fernando City, La Union.
Idi malem kalman a nangrugi a marikna iti napipigsa nga angin a tugot ti bagyo pepito ngem awan unay ti imbuyat na a tudo.
Kangrunaan a nakapadas iti makadadael nga angin ket iti igid ti kabaybayan wenno coastal areas.
Nu ibasar iti datus, awan met iti naipadamag pay a nasaktan gapwanan ti panagduprak ti bagyo pepito.
