AGOO, LA UNION – Naarestar ti maysa a dayo ditoy probinsya ti La Union a nakaaksidente ken ginandat a tarayan dagiti otoridad.
Agarop alas-11:30 ti aldaw ita nga Sabado, Marso 14, 2026 ket agpada a dumaldalyasat ti agpa-abagatan a direksyon da Harvin Gatin Bausing, 30-anyos, miembro ti Coastguard; residente ti Barangay Poro, Ciudad ti San Fernando, La Union, a nagmaneho ti Toyota Vios Sedan; kasta met ni Ray Joseph Viscarra de Castro, 46-anyos, awanan asawa, residente ti Barangay Ligas, Ciudad ti Bacoor, Cavite, a nagmaneho met ti puraw a Subaru Forester, iti kawatiwatan ti national highway ti Brgy. Quinavite, idiay ili ti Bauang.
Sarsarunuen ti Subaru iti Sedan idi nadungpar na ti likudan daitoy. Nagtulagen ti dua a partido a risuten ti problema idiay Bauang Police Station ngem kellat a pinartakan ti dayo iti panagmaneho na iti agpaabagatan a direksyon.
Nakadanon iti panagkamat kenkuana dagiti otoridad agingga idiay Barangay San Marcos, ili ti Agoo, nu sadinno ket nakaaksidente pay isuna ti sabali a motorista ken kinasapulan a dungparen ti lugan na tapno laeng mapasardeng.
Awan pakakitaan iti kooperasyon manipud iti suspek isu a pinaltogan da dagiti sangwanan a pilid na tapno naan-anay a marigatan iti panagtakas. Madi na met a lukatan ti ridaw na isu a pinukpok da daitoy iti bato ken niluktan iti lugan manipud iti uneg.
Kas resulta ket naarestar isuna nga awan ti siasinoman a nadangran ngem nagsagaba dagiti lugan ti otoridad, suspek, ken dagiti biktima na, iti perdisyon ti saan pay a masinunuo a gatad. Iti agdama ket iggem itan ti hurisdiksyon ti Agoo iti dayo a suspek. | via Bombo Rafael Galano
