P200 billion laeng ti inted ti Department of Budget and Management (DBM) manipud iti P513 billion a kiddaw ti Department of Agriculture (DA) a budget para iti 2025.
Binabalaw ni Agri party-list Representative Wilbert Lee ti pannakakissay ti budget a kunana a saan a maitunos iti kari ni Presidente Ferdinand “Bongbong” Marcos Jr. a mangprioridad iti sektor ti agrikultura.
Mainayon pay, kinuna ni Lee a bayat a dimmanon iti P58.45 billion ti naisingasing a 2025 budget para iti pre-harvest services, P13.51 billion laeng ti nailatang para kadagiti post-harvest facilities.
Maysa pay, kinuna ni Lee a kasapulan a mapapigsa ti market linkage kas makita iti nabiit pay nga insidente ti sobra a kamatis idi masapul a tallikudan wenno ilako dagiti mannalon ti Nueva Ecija dagiti produktoda iti nababbaba a presio.
