Dumanon ti 188 iti dagiti pimmusay gapo ti Bagyong Tino, segun ti Office of Civil Defense (OCD).
Maibasar iti report ti ahensia 33 iti natay idiay Negros Island Region, bayat a 140 idiay Region 7.
Agtultuloy iti maisaysayangkat a search, rescue, ken retrieval operations kadagiti 135 a mapukpukaw, kangrunaan idiay Negros Island Region ken Region 7. Buklen daytoy a bilang ti 56 manipud Negros Island Region ken 79 manipud Region 7.
Segun ti National Disaster Risk Reduction and Management Council (NDRRMC), 96 dagiti naipadamag a nasugatan. Apektado dagiti 2,258,782 nga indibidual wenno katukad ti 635,565 a pamilya, ken 397,634 dagiti temporario a nagbakwit.
Nadadael dagiti 9,585 a babbalay, 9,321 dagiti partially damaged, ken 264 iti totally damaged.
Nailista met iti perdision iti agrikultura nga aggatad ti P10,615,193 ken P6,330,000 met iti imprastruktura. Saan pay a madalanan dagiti 74 a kalsada ken 10 a rangtay.
Naisublin iti suplay ti kuryente kadagiti 58 manipud ti 162 affected areas, ken ti komunikasion kadagiti lima manipud ti 22 a lugar.
Agtaltalinaed a problema iti suplay ti danom kadagiti 11 a lugar.
Suspendido iti klase kadagiti 707 a lugar ken trabaho kadagiti 483 a lugar.
Nakaipaayen iti NDRRMC ti tulong nga aggatad ti P111,123,620 kadagiti biktima.
Segun kenni Pangulong Ferdinand “Bongbong” Marcos Jr., inaprobaran nan iti rekomendasion nga ideklara iti state of national calamity gapo iti panagduprak ti Bagyong Tino.###
