LA UNION – Manipulado iti polvoron video a naiwaras iti mismo nga aldaw ti maika-tallo nga State of the Nation Address ni President Ferdinand Marcos Jr. idi Hulyo.
Daytoy ti rimuar iti findings dagiti eksperto manipud Deepfakes Analysis Unit (DAU), maysa nga India-based Misinformation Combat Alliance.
Segun kadagiti AI experts, nagusar dagiti adda iti likudan ti video iti maaw-awagan nga SensityAI, kasta metten iti tool a maaw-awagan ti HIVE.
Nadiskubre ti Deepfakes Analysis Unit a ti nasao a “polvoron video” ket malisyoso ken mangipak-pakita ti senyales ti manipulasyon a maaw-awagan ti “face swap”.
Nakitaan da pay ti manipulasyon iti run time ti video, ken nag-overlap iti “no deepfake” ken deepfake manipulation.
Iti resulta ti findings ti Deepfakes Analysis Unit ket iber-beripika metten ti Vera Files kas maysa nga independent social media unit ken kangrunaan a fact-checkers ditoy pagilian.
Mainaig ti daytoy, kinuna ni Presidential Communications Office (PCO) acting Secretary Cesar Chavez, a vindicated ni President Marcos manipud kadagiti indibidwal a mangikag-kagumaan a dadaelen ti Presidente ken ti kinatao daytoy.
Kinuna na a naipatulod ti nasao a video iti India based misinformation advocate ket nadiskubre dagiti pagilasinan ti nalawa a manipulasyon iti makunkuna a “polvoron video”.
Maipalagip nga immunan nga imbaga ti Philippine National Police (PNP) ken National Bureau of Investigation (NBI) a peke ti nasao a video.
