Inaldaw a banbantayan ti Department of Information and Communications Technology (DICT) ti manipud 100,000 agingga iti maysa a milion nga insidente ti cyberattacks wenno hacking incidents.
Segun kenni DICT Spokesperson ni Assistant Secretary Aboy Paraiso, dakkel a porsiento kadagiti nadakamat a cyberattacks ket naggapu kadagiti ganggannaet a hackers.
Kinunana pay nga inaldaw ti panangisayangkat ti ahensia iti monitoring ken panagadal kadagiti hackers, pakairamanan ti sistema nga us-usarenda para kadagitoy nga aktibidad.
Kagiddan iti daytoy, impaganetget ni Paraiso a dakkel met a tulong no adda ti intelligence fund ti ahensia tapno ad-adda a mapalawa pay ti monitoring.
Inlawlawag ti opisial a saan laeng a dagiti IT experts ken IT consultants ti impamaysa ti DICT, no di ket kasapulan pay ti mangisayangkat iti intelligence build-up para iti nalawlawa a kampania kontra kadagiti cyber threats.
Pinaregta pay ti opisyal ti panakitinnulong ti publiko iti panangmonitor kadagiti insidente ti hacking ken ireport ti aniaman a napadasan wenno napaliiw a cyberattack kadagiti mayannurot nga ahensia ti gobierno.
