BR LA UNION – Inlawlawag iti Department of the Interior and Local Government (DILG) nga awan ti inruar da nga anunsyo ti suspensyon iti klase para ita nga aldaw ti Lunes, Agosto 11, 2025.
Maibasar iti opisyal a waragawag ti ahensya, saan a nangiruar ti advisory nga ‘awan ti serrek’ ni DILG Secretary Jonvic Remulla, ken dagitoy a klase ti anunsyo ket maipaka-ammo babaen iti opisyal ken beripikado a channel.
Innayon pay ti DILG, dagiti local government units (LGUs) ken iti Department of Education (DepEd) ket mabalin nga ag-anunsyo ti suspensyon ti klase iti masakopan da babaen iti opisyal a plataporma.
Kinuna da, iti panangusar ti nagan ti DILG wenno ti sekretaryo tapno agiwaras ti biddut nga impormasyon ket mailabsing iti linteg ken mabalin nga agbanag ti legal nga aksyon.
Inallokoy ti ahensya iti publiko nga agbalin a nasukimat ken mangibinglay laeng ti beripikado nga impormasyon manipud kadagiti opisyal a pages ti gobiyerno.
Para kadagiti lehitimo nga anunsyo maipapan iti suspensyon ti klase, kasasaad ti panawen, ken dadduma pay a napapateg nga abiso, maki-koordinar laeng kadagiti opisyal a social media accounts ken website ti DILG, LGUs, ken DepEd.
