LA UNION – Agtaltalinaed iti aywan ti Indonesian Police ni sigud a Bamban, Tarlac Mayor Alice Guo a natiliw idi bigat Kalman idiay Tangerang City, Indonesia.
Daytoy iti imbatad ni Bombo International News Correspondent Rudy Celeste iti interview ti Bombo Radyo La Union.
Natiliw dagiti otoridad idiay Indonesia ni Alice Guo, nasurok maysa a bulan sipud idi iligal a pimmanaw a rimwar ti pagilian idi Hulyo.
Segun kenni Celeste, nagbalin a napartak iti pannatunton ken panangaresto dagiti pulis idiay Indonesia kenni Guo, gaputi kolaborasyon dagiti otoridad ditoy Pilipinas ken pannaki-tinnulong ti publiko.
Kinuna na a bassit iti impormasyon nga iruruar ti Indonesian Police iti pannaka-tiliw ni Guo, ngem siniguro na a sur-suruten da laeng iti umno a protocol wenno sistema iti panagtiliw, panag-kustodiya, agingga maisubli ditoy Pilipinas iti naglibas a sigud a mayor.
Kinuna ni Celeste nga awan iti press conference nga inaramid dagiti pulis sadiay kasaruno ti pannakatiliw ni Guo.
Innayon pay ni Celeste, napintas a tuladen dagiti otoridad ditoy Pilipinas iti sistema ti Indonesian authorities iti panangtiliw dagiti wanted iti linteg a simple laeng ngem napaspas.
Maipalagip a ni Alice Guo wenno Guo Hua Ping ket sumang-sango iti kaso, kas ti adda pakainaiganna iti operasyon ti maysa nga ilegal a Philippine Offshore Gaming Operator (POGO) idiay Bamban, Tarlac.
