Nangiruar ti nagsina a Show-Cause Order ni Department of Public Works and Highways Secretary Vince Dizon tapno pagpalawagen iti Regional Director ti DPWH Regional Office XI ken iti District Engineer ti Davao Occidental District Engineering Office.
Mainaig daytoy iti P96.5-million Culaman Bridge Flood Control Project idiay Jose Abad Santos, Davao Occidental – maysa a proyekto a nabayadan idi 2022 ngem agingana ita ket saan pay laeng a nalpas.
Inruar ni Dizon dagiti show-cause order para kenni DPWH-Davao Regional Director Juby Cordon ken Davao Occidental District Engineer Rodrigo Larete kalpasan iti napalabas nga inspeksion kadagiti flood control projects.
Idi Huwebes ket natakuatan ni Dizon kenni sigud nga Independent Commission for Infrastructure (ICI) special adviser Baguio City Mayor Benjamin Magalong nga iti proyekto a nairugi a naipatakder – tallo a lawasen iti napalabas ket naideklaran a nalpas ken nabayadanen idi pay 2022.
Iti nadakamat a proyekto ket naipaima iti St. Timothy Construction Company, a kukua ti agasawa a Sarah ken Curlee Discaya nga agdama a maim-imbestigaran gapo iti maipagarop a panakairaman iti korapsion kadagiti flood control projects.
Kasaruno daytoy ket binilin ni Dizon ni Cordon nga agsubmitir ti written explanation under oath iti las-ud ti lima nga aldaw no apay ta saan isuna a rumbeng a pagsungbaten ti administratibo gapo iti posible a panaglabsing iti agdama a linteg, regulasion, ken pammilin.
Malaksid kenkuana ket nabilin met ni Larete a mangipasa ti written explanation under oath iti las-ud ti lima nga aldaw no apay ta saan a rumbeng nga ipila kenkuana iti aniaman a kaso nga administratibo.
Segun kenni Dizon, no mapaay dagiti dua a sumungbat kadagiti show-cause orders iti naituding a panawen ket maibilang daytoy a panangisuko iti karbengan da nga agpalawag, ken iti opisina ti agdesisyon iti saritaan maibasar kadagiti agraraira a record ken ebidensia.###
