Impaganetget ni Department of Public Works and Highways Secretary Vince Dizon a kasapulan a marakrak iti Anti-Graft and Corrupt Practices Committee a binukel ti sigud a sekretaryo Manuel Bonoan tapno imbestigaran iti panagkunniber kadagiti flood control projects.
Segun kenni Dizon, saan a nakailintegan nga iti mismo nga ahensiya iti mangimbestigar kadagiti bukodna nga opisyal ken proyekto.
Addan ti binukel ni Presidente Ferdinand Marcos Jr. nga independent commission nga isu iti agimbestigar kadagiti iregularidad, ken amin nga impormasyon a maala manipud ti maisayangkat a panagamaris kadagiti proyekto ket maipasa iti commission.
Sakbay ti panagikkat ni Bonoan, binukuel na iti nadakamat a komite babaen iti bileg ti Department Order No. 166, series of 2025, tapno siripen iti anomalya dagiti flood control projects kadagiti nadumaduma a paset ti pagilian ken agbalin a platform a pagidanonan dagiti umili no adda ti makitkita nga anomalya iti departamento.
Kabayatanna, impasigurado ni Dizon nga ipamaysa na iti “internal cleaning” wenno panangdalos iti uneg ti ahensiya tapno maurnos dagiti operasyon ken maipasa a sipupudno iti impormasyon iti maiyannatup investigating body.
Kadagiti sumarsaruno nga aldaw, posible a personal a kitaen ti sikretaryo dagiti flood control projects tapno makaala ti nalawlawag a datos seknan ti estado dagitoy.###
