Pagan-annaden ita ti Department of Migrant Workers (DMW) iti publiko mainaig iti agarup 70,000 a peke a job posting nga agsirsirkulo kadagiti social media platforms.
Inikkaten ti ahensia ti nadakamat a bilang dagiti peke a job postings kadagiti nadumaduma a social media platforms kas iti Facebook ken TikTok tapno masalakniban dagiti Pilipino manipud kadagiti manangallilaw a job offers ken mananggundaway nga illegal recruiters a mangituktukon kadagiti peke a trabaho iti ballasiw-taaw.
Iti dagupna, inikkat ti DMW ti 71,653 nga fake job posts, pakairamanan ti 50,220 manipud Facebook ken 21,433 manipud TikTok.
Dagitoy a peke a post ket masansan nga ir-iruar dagiti awan prinsipiona a tattao nga agpampammarang a lehitimo nga recruitment agency a no dadduma ket kopiaenda pay dagiti official page dagiti ahensia a lisensiado ti DMW tapno allilawen dagiti aplikanteda.
Kas sungbat, makipagtrabtrabaho ti DMW iti Facebook ken TikTok tapno dagus a maikkat dagitoy a peke nga accounts.
Paregtaen ni Migrant Workers Secretary Hans Leo Cacdac dagiti Pilipino nga agsapsapul iti panggedan nga agannad ken siguraduen ti kinalehitimo dagiti maitukon a trabaho kadagiti nadumaduma a recruitment agencies.
Dinakamatna pay a mabalin a paneknekan dagiti aplikante dagiti lehitimo a recruitment agencies babaen ti official website ti DMW.
