LA UNION – Kinumpirma ti Department of Justice nga inaresto dagiti otoridad idiay San Francisco, California, USA ni retired PCol. Royina Garma kadwa na ti anak na a ni Angelica Garma.
Mainaig ti daytoy, dagus a binilin ti Justice Department iti Bureau of Immigration nga idaulwan iti proseso ti panangpa-awid ditoy pagilian kenni Garma.
Naipadamag a rimwar iti pagilian laksid ti kari na a dumar-ay iti sumaruno a panagdengngeg ti House Quad Committee seknan iti nadara a war on drugs ti napalabas nga administrasyon Duterte.
Segun kenni Justice Assistant Secretary Atty. Mico Clavano, mangnamnama iti Department of Justice a laksid ti panangibabawi ti Kamara iti contempt order kenkuana ket nagkari daytoy a makitinnulong iti imbestigasyon ti komite.
Iti maysa a waragawag, impaganetget ni Justice Secretary Jesus Crispin Remulla nga agtaltalinaed a committed ti ahensya da tapno mapagtalinaed iti integridad ti justice system ditoy pagilian.
