BR LA UNION – Impaganetget ti Department of Justice (DOJ) a saan a ‘personality driven’ wenno direkta iti maysa a partikular a grupo wenno indibidual iti isay-sayangkat da nga imbestigasyon iti kaso dagiti mapukpukaw a sabungero.
Iti maysa nga interview, impaganetget ni Justice Undersecretary Raul Vasquez nga awan ti pun-puntiryaen da a personalidad iti agtultuloy nga imbestigasyon.
Kinunana nga anyaman ti agbalin a resulta wenno pagbanagan ti imbestigasyon, kayatna laeng a sawen nga isu ti itud-tudo dagiti ebidensiya ken kangrunaan nga adda pakainaiganna iti kaso.
Kinuna ni Vasquez nga awan ti personal nga agenda iti imbestigasyon ken ar-aramidenda laeng ti trabahoda.
Iti agdama, kinumpirma ni Vasquez nga agtultuloy ti panagurnong dagiti otoridad kadagiti ebidensiya mainaig iti kaso dagiti mapukpukaw a sabungeros.
Nairanta daytoy a lalo pay a papigsaen iti kaso a mabalinda nga ipila iti korte kontra kadagiti personalidad nga adda iti likudan ti krimen.
Immunan nga inbilin ni Presidente Ferdinand Marcos Jr. ti naan-anay nga imbestigasyon dagiti otoridad iti nasao a kaso tapno masigurado a dagiti adda iti likudan ti krimen ket mapagsungbat iti linteg.
