BR LA UNION – Mangnamnama iti Department of Justice (DOJ) nga ibilang ni Vice President Sara Duterte iti naidatag a criminal complaints kontra kenkuana kas gundaway tapno dalusan ti nagan na.
Inaramid ni Justice spokerperson Mico Clavano iti waragawag kalpasan nga opisyal a nangidatag ti rekomendasyon iti National Bureau of Investigation (NBI) idiay DOJ idi Miyerkules, ti incitement to sedition ken grave threat complaints kontra iti Bise Presidente.
Inlanad pay ni ASec. Clavano a namnamaen da a duma-ay ni VP Sara iti preliminary investigation ken dadduma pay a mapaawagan.
Kinuna na maysa daytoy a transparent process isunga agan-annad da agsipudta daytoy ket laban ti maysa a kangatuan nga opisyal ti pagilian.
Kinuna na a karbengan ti Bise Presidente nga agsumite ti counter-affidavit kas depensa ken usaren na daytoy tapno maipaayan ti tiyansa a dalusan ti naganna.
Inlawlawag ni ASec. Clavano a ti indatag a complaint ti NBI kontra kenni VP Sara ket agtaltalinaed a nakapenpen iti National Prosecution Service (NPS) tapno analisaren ken maamwan iti “reasonable certainty of conviction”.
Kaipapanan daytoy a mabalin a sumrek dagiti complaints idiay NBI para iti kanayunan a case build-up wenno ituloy iti preliminary investigation, a posible nga agresulta iti panangidatag ti kaso idiay korte.
Maipalagip a nagramot iti reklamo kontra kenni VP Sara kalpasan nga imbutaktak na iti maysa nga online press conference idi napalabas a tawen nga adda binilinna a mangpatay kada Pres. Ferdinand Marcos Jr., First Lady Liza Araneta-Marcos ken House Speaker Martin Romualdez ingkaso a patayen da daytoy.
