LA UNION – Nakasagana iti Department of Justice (DOJ) nga iyakar ti petsa iti intuding da nga imbestigasyon seknan iti kontrobersyal a waragawag ni VP Sara Duterte nga adda iti nakasarita na nga assassin a mangpatay kada President Ferdinand Marcos Jr., First Lady Liza Marcos, ken House Speaker Martin Romualdez, ingkaso nga isuna ti umuna a mapatay.
Segun kenni DOJ Usec. Jesse Andres, nangngegan ti ahensiya iti inwaragawag ni VP Sara seknan iti nakatuding a panagdar-ay na iti panagdengngeg ti Kamara seknan iti Confidential and Intelligence Funds (CIF) ti Office of the Vice President ken Department of Education idi isuna pay ti sekretaryo iti nasao a departamento.
Gaputa agpada a naituding ita nga aldaw ti Biyernes, Nov. 29 iti hearing ti Good Gov’t panel ken initial investigation ti National Bureau of Investigation, patgan da iti kadawatan ni VP Sara nga iyakar ti petsa tapno makadar-ay nga umuna idiay Kamara.
Ngem iti press briefing ti komite idi kalman, nagdesisyon dagiti mammanday linteg nga isuda ti ag-postpone ti petsa tapno unaen ti bise president a dar-ayan iti imbestigasyon dagiti otoridad.
Nupay kasta, imbaga ni USec. Andres, a posible nga iyakar da inton Lunes wenno Martes tapno rugyan ti imbestigasyon dagitoy.
Impaganetget pay ni Andres, nga importante ti panagdar-ay ni VP Sara iti nasao nga imbestigasyon agsipudta kasapolan a madetermina ditoy iti kinapudno iti likod dagiti kontrobersyal a waragawag ni Duterte.
Impaganetget ti opisyal nga ikonkonsidera ti DOJ iti waragawag ni Duterte kas seryoso a pangta iti biag dagiti tallo a nainaganan nga opisyal.
